Abentura osasungarriak

Zenbat aldiz ez ote dugu esaten gustatzen ez zaigula probatu ere egin ez dugun zerbait?  Fruta eta barazkien mundua oso askotarikoa da, eta zapore, testura eta aroma zoragarriak aurki ditzakegu haietan.   Ausartentzako moduko erronka bat proposatzen dizugu: probatu inoiz jan ez duzun elikagai osasungarriren bat eta egin errezeta bat harekin. Idatzi, jarri eta apaindu kartoi-mehe batean, egin argazkia eta partekatu pasaporte osasungarriaren webgunean, eta partaide bilakatuko zara erronka berrian. 

Sukaldari handiek irudimena askatu egiten dute plater originalenak sortu ahal izateko. Aukeratu zure gustuko paisaia, animalia edo pertsonaiaren bat, eta osa ezazu elikagai osasungarriak erabiliz. Bukatzen duzunean, egin argazki bat, partekatu pasaporte osasungarriaren webgunean, eta partaide bilakatuko zara erronka berrian.

Loreen hilabetea da maiatza. Lorez josita dago dena, eta usain zoragarria dute. Badakizu badagoela modu bat loreak betiko gordetzeko? Hartu mendian gehien gustatzen zaizkizun lore txikiak, lehor itzazu egun batzuez liburu potolo batean, eta gero egin ezazu konposizio polit bat paper zuri batean itsatsiz. Igo argazki bat zure sormen-lana erakusteko.

Beti da ona mugitzea eta kirola edo jarduera erakargarriak egitea. Zer entretenimendu dituzun jakin nahi dugu hilabete hauetan. Zer joko edo kiroletan aritzen zara? Urtaro egokia iritsi arte itxaron behar izaten dugu kirol batzuetan aritzeko, baina erakutsiko al diguzu nola aritzen zaren zure kirol gogokoenean? Igo bideo bat erakusteko nola aritzen zaren zure jarduera gogokoenean, bakarrik, lagunekin edo familiarekin; eta esaguzu zergatik gustatzen zaizun hainbeste.

Bada behar bezala elikatzeko eta aldi berean primeran pasatzeko modu bat, honako hau: sukaldaritzan gozatzea. Sukaldari handiak modu horretan hasten dira beren lanbidea maitatzen. Oraingo honetan panpina bat egitea nahi dugu, betiere eskura dituzun eta zikintzen ez duten elikagaiak erabiliz. Eratu figurak, egin iezaiezu argazki bat eta igo sarera zure artelanaren irudia.

Urriak eta azaroak ematen diote hasiera udazkenari. Urtaro horretan, zuhaitzetako hostoak kolorez aldatu eta erortzen hasten dira. Gainera, fruitu asko sortzen dira sasoi horretan: gaztainak, hurrak, intxaurrak... Zergatik ez zara aukeraz baliatzen mendian paisaia paregabeak ikusteko? Proposatu zure familiari txango bat egitea eta bidal iezaguzu udazken giroko argazkirik dibertigarriena. Bota airera hostoak, bildu fruituak, egin piknik bat... bururatzen zaizuna! Baina guri erakutsi, eta zure pasaportearen lehen erronka gaindituko duzu.